Gestir og ferðafólk
Á Akranesi er mannlíf í miklum blóma. Íbúar á Akranesi hafa aldrei verið fleiri og bærinn stækkar ört. Akranes er friðsæll og fallegur bær þar sem fjölskyldur geta búið sér sitt framtíðarheimili. Á Akranesi er einstaklega fjölskylduvænt og öruggt umhverfi þar sem áhersla er lögð á mikla og vandaða þjónustu við íbúa. Öflugt atvinnulíf sem býður upp á örugg störf á margvíslegum vettvangi, ásamt húsnæði á góðu verði, hefur orðið til þess að sífellt fleiri kjósa að búa á Akranesi.
Á Akranesi er alltaf eitthvað að gerast. Hver viðburðurinn rekur annan og reyndar er það svo að fáir dagar líða án þess að eitthvað sé ekki í gangi á sviði menningar, lista eða íþrótta. Á Akranesi er öflugt menningarstarf og reglulega eru haldnir tónleikar, ýmist á vegum einhvers hinna fjölmörgu kóra sem starfandi eru eða einleiks eða einsöngs efnilegra listamanna.
Á Akranesi er mikil áhersla lögð á margvíslega menningarviðburði, bæði til að gera heimamönnum dagamun en líka til að laða að gesti og ferðamenn. Í byrjun júní er blásið til Hátíðar hafsins, daginn fyrir Sjómannadag og þá er vettvangur hátíðahalda hafnarsvæðið. Mikill metnaður er lagður í hátíðahöld Þjóðhátíðardagsins 17. júní á Akranesi og nokkrum dögum síðar halda Skagamenn eitt stærsta íþróttamót sem haldið er á Íslandi, þ.e. hið s.k. Skagamót hinna yngstu á knattspyrnuvellinum. Fyrstu helgi júlímánaðar halda Skagamenn Írska daga hátíðlega með götugrillum og bryggjuböllum. Í byrjun nóvember ár hvert er menningarhátíðin Vökudagar síðan haldin.
Íþróttalífið á Akranesi er landsfrægt, ekki aðeins knattspyrnan heldur er margt fræknasta sundfólk landsins frá Akranesi. Nánast daglega er keppt í einhverri íþrótt á Akranesi. Á sumrin eru haldin fjöldamörg golfmót, jafnt fyrir byrjendur sem lengra komna golfara og er óhætt að segja að starfsemi Golfklúbbsins Leynis sé afar öflugt og viðburðaríkt. Kynntu þér málið betur á upplýsingavef golfklúbbsins.
Safnasvæðið að Görðum er ekki einungis áhugavert og skemmtilegt heima að sækja, heldur líka afar fræðandi fyrir alla fjölskylduna. Ef þú vilt kynna þér betur það sem Safnasvæðið hefur upp á að bjóða skaltu smella hér.
Á Akranesi er eitt vinsælasta tjaldsvæði landsins - en um leið eitt hið ódýrasta. Þar er fjölbreytt þjónusta í boði og ekki spillir staðsetningin fyrir, við Kalmansvík með útsýni yfir Faxaflóann og allt til Snæfellsjökuls á aðra hönd en Akrafjallið á hina. Stutt er í fjölbreytta þjónustu, verslanir, sund og golf.
Fjölbreytt þjónusta er í boði fyrir gesti og ferðafólk á Akranesi; veitingastaðir og kaffihús, verslanir og gisting. Þá gengur Strætó frá höfuðborgarsvæðinu og upp á Skaga og þar tekur við gjaldfrjáls innanbæjarstrætó. Þá er hægt að leigja sér reiðhjól á Akranesi til að komast á milli staða, enda hvergi betra að hjóla en á flatlendinu á Akranesi.
Kynntu þér vel það sem Akranes hefur upp á að bjóða – þú finnur áreiðanlega eitthvað við þitt hæfi!
Frekari upplýsingar um afþreyingarmöguleika og þjónustu á Akranesi er að finna á ferðavef bæjarins: www.visitakranes.is