1. júlí 2011 03:24

Írskir dagar settir með stæl!

Fjölskylduhátíðin Írskir dagar hófst með látum í morgun þegar liðlega 400 leikskólabörn töldu niður með Árna Múla Jónassyni, bæjarstjóra á Akranesi og settu hátíðina og sungu svo með Ingó Veðurguð sem mætti á Safnasvæðið með gítarinn og tók lagið með börnunum. Raunar leit annar leynigestur við á svæðinu en það var sekkjapípuleikarinn Anthony sem lék nokkur lög fyrir börnin, íklæddur skotapilsi.

Björn Lúðvíksson tók meðfylgjandi stuttmyndir á svæðinu sem endurspegla vel þá skemmtilegu stemningu sem var á svæðinu í morgun.

http://www.youtube.com/watch?v=blPiUse_kBs

http://www.youtube.com/watch?v=4Ljie_yNWKo

Skagamenn tóku reyndar forskot á hátíðina í gær en þá voru haldin fróðleg erindi í Garðakaffi um keltnesk áhrif í íslenskri menningu og tungu að viðstöddu fjölmenni og þá var boðið upp á ekta írska þjóðlagatónlist. Í Stúkuhúsinu sungu Stúkurnar fyrir fullum sal og þá var fullt út úr dyrum á tónleikum Hjálma á Breiðinni.

Írskir dagar byrja því vel og þrátt fyrir smá rigningarskúr nú síðdegis er veðurútlitið gott og stemningin í bænum sömuleiðis fín!

30. júní 2011 12:12

Saman ég og þú - og allir saman nu!

Nú eru Írsku dagarnir rétt handan við hornið og undirbúningur hátíðarinnar í hámarki. Skagamenn eru farnir að huga að skreytingum og stemningin magnast með hverjum klukkutímanum. Til að gulltryggja réttu stemninguna þarf fólk að hlusta á lagið "Saman ég og þú" sem samið var sérstaklega fyrir Írska daga á Akranesi. Höfundar lags og texta eru snillingarnir og Skagamennirnir Flosi Einarsson og Gunnar Sturla Hervarsson en lagið er flutt af öðrum Skagamanninum, Hallgrími Ólafssyni og hljómsveitinni Sigurfararnir.

Friðþjófur Helgason, myndsmiður og - jú mikið rétt -  Skagamaður gerði myndband við lagið, með skemmtilegum svipmyndum frá Akranesi sem fanga m.a. vel þá einstöku stemningu sem alltaf er á Írskum dögum.

Saman ég og þú 

29. júní 2011 09:09

Nýtt á Írskum dögum

Dagskrá Írskra daga hefur nú tekið á sig nokkuð endanlega mynd en þó hafa nýjir dagskrárliðir bæst við í dag. Um er að ræða sk. "Bryggjugolf" sem golfklúbburinn Leynir mun bjóða upp á við Akraneshöfn en þar gefst fólki kostur á að slá golfkúlur á haf út og freista þess að hitta í mark/holu sem komið verður fyrir úti á miðri höfninni. Er þetta gert í fjáröflunarskyni fyrir klúbbinn.

Þá hefur dagskrá lokahátíðar Írskra daga á sunnudeginum tekið á sig mynd en hátíðin fer fram á Jaðarsbökkum neðan við Akraneshöllina, eins og raunar dagskrá laugardagsins. Á lokahátíð koma fram Brúðubíllinn, Pollapönk og Friðrik Dór. Auk þess verður boðið upp á listasmiðju og þrautabraut, minigolf og margt fleira.

Þá er rétt að vekja athygli á því að Björgunarfélag Akraness verður á Langasandi laugardag og sunnudag á milli kl. 14:00 og16:00 með gúmmíbátana "Axel S" og "Jón M" og býður gestum og gangandi í ævintýralega siglingu. Þetta er eitthvað sem allir verða að prófa!

29. júní 2011 08:39

Bryggjugolf á Írskum dögum

Afrekshópar golfklúbbsins Leynis verða með bækistöðvar við Hafnarhúsið á Akranesi laugardaginn 2. júlí, upp úr hádeginu og fram eftir degi. Þetta er heldur óvenjuleg staðsetning fyrir kylfinga, en gestir og gangandi á Írskum dögum geta slegið golfbolta á skotmark úti á Akraneshöfn gegn vægu gjaldi. Er þetta fjáröflun fyrir afreksstarf Leynismanna.  Leikurinn gengur út á að þeir sem hitta skotmarkið fá nafn sitt í pott og eiga þar með möguleika á að vinna til veglegra verðlauna. Það er verslunin Omnis sem er bakhjarl Leynismanna í þessu verkefni.

29. júní 2011 06:09

Öll dagskrá Ískra daga komin á farsímavef Símans

Síminn hefur nú sett alla dagskrá Írskra daga inn á farsímavef Símans, "M-ið" (m.siminn.is). Hægt er að nálgast dagskrána undir "Meira Ísland" og velja þar "Vesturland". 

Hægt er að fara beint inn á dagskrársíðurnar með því að smella hér.

Einnig má benda á ýmsar skemmtilegar upplýsingar um m.a.  sundlaugar, tjaldsvæði og annað sem nauðsynlegt er að vita þegar fólk er á Írskum dögum. Ástæða er til að þakka Símanum fyrir þetta framtak sem auðveldar fólki að nálgast fjölbreytta og skemmtilega dagskrá Írskra daga á Akranesi í símanum sínum!

29. júní 2011 02:07

Aukin gæsla og hærri aldurstakmörk á tjaldsvæðinu á Akranesi á Írskum dögum

Um næstu helgi, dagana 1. til 3. júlí, verða Írskir dagar haldnir á Akranesi en þetta er í tíunda skiptið sem hátíðin er haldin. Gert er ráð fyrir að fjöldi gesta taki þátt í þessari fjölbreyttu fjölskylduskemmtun. Undirbúningur gengur vel og veðurútlitið lofar góðu. Tjaldsvæðið í Kalmansvík á Akranesi verður fjölskyldutjaldsvæði á Írskum dögum. Þetta þýðir að öllum unglingum og ungu fólki yngra en 23 ára verður vísað frá tjaldstæðinu, nema um sé að ræða fjölskyldufólk, þ.e. foreldra með börnin sín. Gripið hefur verið til sambærilegra aðgerða undanfarin ár - af gefnu tilefni - og með góðum árangri. Öflug gæsla verður á svæðinu alla helgina, sérhæfðar gæslusveitir, björgunarsveitir og lögregla ásamt starfsfólki tjaldsvæðisins til að tryggja að allt fari vel fram. 

Sérstök verðskrá gildir á tjaldsvæðinu í Kalmansvík á Írskum dögum.  Allir gestir 14 ára og eldri greiða 2.000 kr. fyrir alla helgina, einnig greiðast 2.000 kr. fyrir hvern gististað; tjald, fellihýsi, hjólhýsi eða húsbíl. Innifalin í gjaldinu er aðgangur að allri aðstöðu og þjónustu á svæðinu, m.a. þvottavél, þurrkara, sturtum og rafmagni.  Hver gestur fær armband til auðkennis sem gildir sem aðgangur að tjaldsvæðinu þessa helgi. Vinsamlegast athugið að Útilegukortið gildir ekki á tjaldsvæðinu í Kalmansvík þessa helgi. Sturtuaðstaða og þvottahús er opin frá kl 07:00 til 22:00. 

Almennar umgengnisreglur sem gestir á tjaldsvæðinu eru vinsamlegast beðnir að virða:

1. Bifreiðastöður eru bannaðar á tjaldsvæðinu, vinsamlegast leggið bílum á bílastæðum. Öll  óþarfa umferð um tjaldsvæðið skapar hættu og er bönnuð - Þetta er fjölskyldutjaldsvæði og börn að leik á milli húsa og á götum svæðisins.

2. Undantekningarlaust á að vera komin á næturró kl. 23:00 á kvöldin.

3. Verði gæsluaðilar varir við unglingadrykkju á svæðinu verður málið umsvifalaust kært til lögreglu. Hið sama gildir að sjálfsögðu ef grunur er um fíkniefnaneyslu á svæðinu.

4. Allar skemmdir sem gestir vinna á aðstöðu eða eignum annarra verða kærðar til lögreglu. 

Brot á ofangreindum reglum varða brottvísun af tjaldsvæðinu. Aðstandendur Írskra daga vonast til þess að allir skemmti sér vel á Írskum dögum og haldi heim á leið með góðar minningar frá Akranesi!

Fjölbreytta og glæsilega dagskrá hátíðarinnar má skoða á vef Írskra daga  – www.irskirdagar.is

29. júní 2011 11:43

Kynningarbæklingur kominn úr prentun

Kynningarbæklingur með dagskrá Írskra daga er kominn út og verður dreift í öll hús á Akranesi síðdegis. Bæklingurinn mun einnig liggja frammi á þjónustustöðum víða um bæinn. Hægt er að skoða bæklinginn með því að smella hér.

24. júní 2011 08:58

Kraftaáskorun, krakkaþrautir og MAMMÚNG

Sífellt bætast við nýir dagskrárliðir á Írskum dögum á Akranesi, 1. til 3. júlí nk. Rétt í þessu var Hjalti "Úrsus" Árnason að boða komu sína á Skagann með Kraftaáskorun þar sem meira og líka minna sterkir einstaklingar geta reynt með sér við ýmsar þrautir, m.a. Húsafellshelluburð... Sterkasti maður Íslands mun vera á meðal þátttakenda í þessari áskorun. Á sunnudeginum verður boðið upp á Krakkaþrautir; hreystibraut sem Halla Heimisdóttir, íþrótta- og lýðheilsufræðingur stjórnar. Öll þessi dagskrá fer fram á Jaðarsbökkum við Akraneshöll. Þá mun MAMMÚNG mæta á svæðið á laugardaginn og halda frábæra tónleika á Jaðarsbökkum frá kl. 15:30 til 17:00 en Mammúng er stytting á Menningarsjóður unga fólksins. Tilgangur Mammúng er að vinna að uppbyggingu á menningarhúsi fyrir ungt fólk, þar sem það getur komið list sinni á framfæri við bestu hugsanlegu aðstæður. Nánari upplýsingar um tónleikana verða settar inn á irskirdagar.is strax og þær liggja fyrir.

24. júní 2011 03:25

Fín veðurspá fyrir Írska daga

Samkvæmt langtímaveðurspá er gott útlit fyrir Írska daga allt frá föstudegi til sunnudags; sól og milt veður föstudag og laugardag en spáð er skýjuðu en mildu veðri á sunnudeginum. Veðurspá fyrir Írska daga má m.a. skoða með því að smella hér.

24. júní 2011 11:38

Mýrarbolti, reiðhjólakeppni, aksturskeppni - og Lopapeysan!

Dagskrá Írskra daga verður afar fjölbreytt þetta árið og raunar eru enn að bætast við nýjir dagskrárliðir. Í ár verður í fyrsta sinn haldið Mýrarboltamót en sigur í þeirri keppni tryggir þátttökurétt í hinu árlega Mýrarboltamóti á Ísafirði. Skráning á mótið er hafin. Þá verður einnig efnt til hörku hjólreiðakeppni, hinnar fyrstu sem haldin er á Akranesi í langan tíma. Raunar er það svo að nú munu vera 100 ár frá því að fyrsta hjólreiðakeppnin var haldin á Íslandi en hún var einmitt haldin á Akranesi. Ræst verður frá Bónus/Nessport, sem eru aðstandendur keppninnar og hjólaðir ýmist einn eða tveir hringir í kringum Akrafjall í nokkrum styrkleikaflokkum. Í bakaleiðinni verður hjólað um götur bæjarins og endað á sama stað við Bónus. Meðal annarra dagskrárliða má nefna írska vöku þar sem Þorvaldur Friðriksson, fornleifafræðingur og fréttamaður fjallar um keltnesk áhrif í íslenskri tungu, menningu og umhverfi en Þorvaldur hefur á undanförnum liðlega 30 árum rannsakað þessi merkilegu mál. Fjölmargir skemmtilegir viðburðir aðrir verða í boði á Írskum dögum og má þar síðast en ekki síst nefna hina árlegu Lopapeysu á Sementsbryggjunni þar sem Björgvin Halldórs, Paparnir, Ingó og Veðurguðirnir og Hreimur skemmta meðal annars. Kynntu þér dagskrána og skelltu þér svo á Írska daga á Akranesi!

21. júní 2011 02:40

Fjölbreytt og glæsileg dagskrá

Mikið verður um dýrðir á Írskum dögum 1. - 3. júlí nk. Margar af þekktustu hljómsveitum landsins koma fram og má þar nefna Hjálma, GusGus, Vini Sjonna og Bogomil Font og Milljónamæringana ásamt Bjarna Ara. Lopapeysan er á sínum stað en þar koma fram m.a. Björgvin Halldórsson og Ingó og Veðurguðirnir. Írska hljómsveitin "Na Draoithe" verður með tónleika í Garðakaffi á írskri vöku á fimmtudeginum og aftur á laugardagskvöldinu.

Á laugardeginum verður afar fjölbreytt dagskrá á svæðinu við Akraneshöllina og inni í höllinni verður markaður, einn sá fjölmennasti sem haldinn er á landinu ár hvert,  kökukeppni mömmur.is og vélhjólasýning. Fjölskylduskemmtunin á sunnudeginum fer einnig fram á svæðinu neðan við Akraneshöllina. Það er því margt í boði og örugglega eitthvað fyrir alla á Írskum dögum á Akranesi 2011.

21. júní 2011 09:43

Dagskrá Írskra daga 2011

Nú liggur dagskrá Írskra daga 2011 fyrir í grófum dráttum, þó að enn eigi eftir að bætast við nokkrir liðir. Dagskrána má skoða með því að smella hér.

17. febrúar 2011 11:55

Írskir dagar 1. til 3. júlí 2011

Eins og allir velunnarar Írskra daga á Akranesi vita er hátíðin jafnan haldin fyrstu helgi júlímánaðar ár hvert. Í ár fer hátíðin því fram dagana 1. til 3. júlí og er þegar farið að huga að dagskrá hennar. Allir þeir sem áhuga hafa á að taka þátt í Írskum dögum með einum eða öðrum hætti eða hafa hugmyndir um hátíðina eru góðfúslega beðnir um að gefa sig fram við Akranesstofu, Stillholti 16 - 18, 300 Akranesi í síma 433 1000 eða með því að senda tölvupóst á netfangið tomas.gudmundsson@akranes.is.

Munið að taka fyrstu helgina í júlí frá og verið velkomin á Írska daga á Akranesi!

4. júlí 2010 11:25

Fjölskylduskemmtun í Garðalundi

Í dag fer fram lokadagskrárliður hátíðarhalda Írskra Daga á Akranesi en það er fjölskylduskemmtun í Garðalundi sem hefst kl. 14:00. Þar munu Trjálfarnir skemmta viðstöddum auk þess sem Solla stirða kemur í heimsókn auk Leikhópsins Lottu sem sýna mun leikritið um Hans Klaufa. Þá verður Tilraunalandið á staðnum auk þess sem hoppukastalar verða á staðnum.

Hátíðarhöld helgarinnar hafa tekist mjög vel og frábær þáttaka hefur verið í öllum viðburðum. Skipuleggjendur vilja koma á framfæri þakklætri til allra sem lögðu hönd á plóginn. Þá viljum við þakka öllum þeim sem sáu sér fært að mæta og taka þátt en án þeirra er ekki hægt að halda svona glæsilega hátíð.

Það er von okkar að allir muni koma til með að skemmta sér vel í Garðalundi í dag og fari síðan heilir heim með bros á vör eftir skemmtilega hátíð.

3. júlí 2010 10:19

Keppni - keppni

Í dag fara fram alls kyns keppnir í tengslum við Írska daga og hvetum við alla til að taka þátt. Nú í morgun kl 10 hófst keppni í sandkastalagerð á Langasandi. Þar er keppt um fjölmarga titla en verðlaunað verður í eftirfarandi flokkum:

Besti sandkastalinn

Fallegasta listaverkið

Fjölskyldan saman

Yngsti keppandinn.

Á stóru bryggjunni hófst einnig dorgveiðikeppni sem haldin er í boði verslunarinnar Model og að sjálfsögðu eru þar veglegir vinningar í boði. Í hádeginu verður svo blásið til grillveislu fyrir utan verslunina Model við Þjóðbraut.

Í íþróttahúsinu við Jaðarsbakka verður nóg um að vera þar sem að haldinn verður markaður í dag en hann hefst klukkan 13. Á planinu þar hefur verið komið upp Tívolígræjum sem gestir írskra daga eru hvattir til að prófa. Tvær keppnir munu fara fram í íþróttahúsinu en þar mun keppnin um Hittnustu ömmuna í körfu fara fram milli kl 14 og 16. Þar verður keppt í tveim flokkum; Hittnasta amman og Aldursforsetinn. Verðlaunin eru ekki af verri endanum en sigurvegarar í báðum flokkum fá gjafabréf frá versluninni Bjargi á Akranesi og bikar til eignar. Hittnasta amman fær þar að auki gjafabréf frá Iceland Express. Það er því um að gera fyrir allar ömmur að mæta með körfuboltataktana á Jaðarsbakka í dag.

Rauðhærðasti íslendingurinn verður síðan valinn kl 15 en þar fær efnilegasti rauðhausinn verðlaunabikar. Í verðlaun fyrir titilinn rauðhærðasti íslendingurinn er gjafabréf frá Iceland Express auk þess sem sigurvegarinn fær bikar til eignar.

Ýmiss konar afþreying er þar að auki í boði á Akranesi í dag auk tívolísins og markaðarins á Jaðarsbökkum. Á Safnasvæðinu munu víkingahóparnir Hringhorni og Rimmugýgur vera með bardaga og leikjasýningar kl 13, kl 15 og kl 17 auk þess sem sagnaþulan Þóra Gríms segir sögur úr goðafræði kl 16.

Þá hefur verið komið upp Go-kart braut á planinu við Tónberg og Lazer tag og litboltavöllur er við Sementsþrónna við Faxabraut. Þá verður glæsileg bílasýning Bílaklúbbs Vesturlands og Bílaklúbbsins Krúser á planinu fyrir framan Stjórnsýsluhúsið við Stillholt.

Svo má ekki gleyma Brekkusöng og Lopapeysu í kvöld.

Það er því nóg um að vera á Skaganum í dag og vonum við að allir skemmti sér sem best.  

2. júlí 2010 03:35

Opnunarhátíð og dagskráin framundan

Írskir dagar voru formlega settir kl 10 í morgun á Safnasvæðinu. Þar komu leikskólabörn bæjarins saman og mynduðu írska fánann í brekkunni við Byggðasafnið. Guðmundur Páll Jónsson setti hátíðina formlega fyrir hönd bæjarstjórnar og síðan birtist leynigesturinn, sjálfur Ingó Veðurguð og söng nokkur lög með viðstöddum. Krakkarnir voru í skýjunum yfir þessum óvænta gesti og tóku vel undir með honum í brekkusöngnum. Hér er að finna myndir frá opnunarhátíðinni.